Eallit dál

Daid nannáma eallišlájain Várjjagis leat dál bohccot, ealga, rieban, njálla, geatki, albbas, guovža, njoammil, čeavrris, neahti ja muhtimiin gumpe. Bisámroahttu mii lea leavvan Suomas ja Ruoššas, lea maid áicojuvvon dán guovllus.

Várjjatvuotna lea guollevallji vuotna, gos dorski, sáidi, diksu ja áhkacincu leat dálá dehálamos gávppálaš guollešlájat. Gonagasreabbá ráhkadii guolásteaddjiide stuorra váttisvuođaid 1990-logus, muhto dál lea dat boahtoresursan.

Geađgenjuorju ja deavut ellet Várjjatvuonas miehtá jagi, ja gahtte, ruoššanjuorju, arktalaš njuorju ja áhpenjuorju finadit guovllus dálvit ja giđđat. Daid stuorát mearanjiččehasain áicojuvvojit nissu ja buovjja dávjjimusat Várjjatvuonas.

Várjjagis lea valljás loddeeallin. Daid lottiid gaskkas mat dáppe leat miehtá jagi leat earret eará rievssahat, mearragoaskimat, hávddat, ciellažat, skávhllit, garjját, gaccepaččat, cizážat, beibbožat ja skuolffit. Juohke geasi bohtet máŋggalágan gálalottit, boralottit ja suorssát bessensajiidasaset Várjjagis, ja stuorra gorgeshávdadoahkit ja sáivahávdadoahkit leat badjel dálvvi dán guovllus.

Norsk 
Tilbake Tips en venn!